Umræðufundur var haldinn í vikunni um innleiðingu Heimsmarkmiða Sameinuðu þjóðanna til eflingar samfélagsins á Suðurnesjum, þar sem eru fjögur sveitarfélög: Grindavík, Reykjanesbær, Suðurnesjabær og Vogar. Auk sveitarfélaganna fjögurra taka Kadeco, Isavia og Samband sveitarfélaga á Suðurnesjum þátt í Suðurnesjavettvangnum sem stóð að þessum rafræna fundi. 140 manns tóku þátt í fjörlegum umræðum í málefnahópum. Tilkynnt var í lok fundarins að allir sem standa að Suðurnesjavettvangnum myndu skrifa undir yfirlýsingu um að hraða innleiðingu hringrásarhagkerfisins. Í því felst m.a. skuldbinding um að vinna áfram að aðgerðum til að vinna að samdrætti í losun gróðurhúsalofttegunda, sameinast gegn þeirri ógn sem felst í plasti í umhverfinu og ráðist verði í aðgerðir gegn matarsóun. Sérstökum hópi verður falið að halda utan um verkefnið.
Markmið allra í þessari vinnu var að snúa vörn í sókn á Suðurnesjum, efla atvinnulíf og styrkja innviði svæðisins. Katrín Jakobsdóttir, forsætisráðherra, lýsti aðdáun sinni á þeirri vinnu sem lægi að baki, hvernig tekist hafi til við að endurskoða áætlanir og leiðir eftir að Covid-19 skall á. Þar hefði komið til þrjóska, dugnaður, þolinmæði og metnaður fyrir hönd samfélagsins. „Tækifærin eru óteljandi á Suðurnesjum,” sagði forsætisráðherra.
Aðrir ráðherrar sem ávörpuðu fundinn voru Sigurður Ingi Jóhannsson, samgöngu- og sveitarstjórnarráðherra, Bjarni Benediktsson, fjármála- og efnahagsráðherra, Þórdís Kolbrún Reykfjörð Gylfadóttir, ferðamála-, iðnaðar- og nýsköpunarráðherra, og Guðmunur Ingi Guðbrandsson, umhverfis- og auðlindaráðherra. Öll fögnuðu þau framtakinu og samstöðu Suðurnesjamanna í því verkefni að hefja nýja sókn og hétu stuðningi sínum.
Bæjarstjórarnir fjórir á Suðurnesjum kynntu niðurstöður málefnahópa. Sameiginlegur vilji allra er að Suðurnesin verði hringrásarhagkerfi, dregið verði úr úrgangi og endurvinnsla aukin. Fram kom það sjónarmið að í raun ætti ekki að tala lengur um „rusl” heldur „hráefni.” Sveitarfélögin og fyrirtækin á Suðurnesjum ætla að vinna saman kolefnisbókhald, mæla kolefnisfótspor og setja sér markmið um losun. Þá var rætt um vistvæna iðngarða, Eco-Industrial Park eða Suðurnesjagarð, í nágrenni Keflavíkurflugvallar, og flugvöllurinn verði hleðslustöð fyrir vistvænar flugvélar framtíðarinnar. Að síðustu má nefna hugmyndir um að komið verði á fót alþjóðlegum umhverfisháskóla á Suðurnesjum og að umhverfisfræðsla verði ríkari þáttur í kennslu frá grunnskólaaldri.
Fram kom í opnunarávarpi Sveinbjarnar Indriðasonar, forstjóra Isavia, að síðustu mánuðir hefðu verið þungbærir vegna áhrifa heimsfaraldursins á flugið og ferðaþjónustuna. „En við ætlum að standa þetta af okkur og horfa til framtíðar,” sagði Sveinbjörn og benti á að Heimsmarkmið Sameinuðu þjóðanna væru meðal leiðarljósa. „Við teljum einfaldlega að þessar áherslur muni skapa okkur samkeppnishæfni til framtíðar.”
