Í þróunaráætlun fyrir nærsvæði Keflavíkurflugvallar, K64, er horft fram til ársins 2050. Þróunaráætlunin er heildstæð sýn á uppbyggingu í kringum Keflavíkurflugvöll á ákveðnum þróunarsvæðum sem saman mynda vistkerfi sem einkennist af samvinnu og sambúð iðnaðar, samgangna, nýsköpunar og sjálfbærrar byggðaþróunar.
Nafnið K64 var valið sem regnhlífarhugtak yfir þann fjölda verkefna sem hrint verður í framkvæmd á næstu árum og áratugum, en nafnið vísar í Keflavíkurflugvöll og svæðið umhverfis hann, sem og til staðsetningar Suðurnesjanna á 64. breiddargráðu.
Frá árinu 2019 hafa íslenska ríkið, Isavia, Reykjanesbær og Suðurnesjabær verið samtaka um að vinna saman að heildstæðri stefnu og framtíðarsýn fyrir landsvæðin í nágrenni Keflavíkurflugvallar. Þróunarfélag Keflavíkurflugvallar, Kadeco, leiðir verkefnið fyrir hönd þessara aðila.
Þróunaráætlunin miðar að því að nýta styrkleika flugvallarins og þau miklu tækifæri sem er að finna á Reykjanesinu sem drifkraft efnahagslegrar fjárfestingar, atvinnusköpunar og almennra lífsgæða á svæðinu og fyrir íslenskt samfélag í heild. Rík áhersla er lögð á að svæðið þróist í takt við samfélagið í kring.
Þróunaráætlunin nær til ársins 2050 en fyrstu skrefin verða tekin strax. Má þar nefna þróun grænna iðngarða við Helguvíkurhöfn, uppbyggingu íbúða á Ásbrú og bættar almenningssamgöngur milli flugvallar og höfuðborgar.
Hægt er að kynna sér nýja þróunaráætlun nánar á vef verkefnisins, www.k64.is
