Í dag, 25. september, er fánadagur heimsmarkmiða Sameinuðu þjóðanna um sjálfbæra þróun og er hann nú haldinn í annað sinn á Íslandi. Fánadagurinn hefur stækkað ár frá ári og eru þátttakendurnir hundruð fyrirtækja, stofnana, félagasamtaka, skóla og sveitarfélaga um allan heim og er Kadeco þar á meðal. Kadeco hefur verið þátttakandi í Suðurnesjavettvangi frá árinu 2019, svæðisbundnu samstarfi sveitarfélaganna fjögurra á Suðurnesjum, Isavia, Kadeco og Sambands sveitarfélaga á Suðurnesjum. Verkefnið snýr meðal annars að því að efla atvinnulíf og styrkja innviði Suðurnesjanna í átt að sjálfbærri framtíð og eru heimsmarkmið Sameinuðu þjóðanna höfð að leiðarljósi í þeirri vinnu. Lesa má nánar um Suðurnesjavettvang hér.
Heimsmarkmið Sameinuðu þjóðanna um sjálfbæra þróun voru samþykkt af fulltrúum allra aðildarríkja Sameinuðu þjóðanna í september árið 2015. Markmiðin gilda á tímabilinu 2016-2030 og snúa að því að skapa betri heim, meðal annars með því að ná tökum á loftslagsbreytingum, auka jöfnuð og útrýma sárafátækt. Tilgangur fánadags heimsmarkmiðanna er að minna á mikilvægi þess að við tökum öll þátt í að vinna að þeim.
Kadeco hvetur öll til þess að kynna sér heimsmarkmiðin um sjálfbæra þróun og taka þátt í þessari vegferð. Frekari upplýsingar má finna á heimasíðu um heimsmarkmiðin.
